ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັ
ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ ຮ່າງຄຽວອານ ນາຍົກລັດຖະມົນຕີ ແຫ່ງ ສາທາລະນະລັດ ເກົາຫລີ ພ້ອມຄະນະ ໃນວັນທີ 14 ທັນວາ 2015 ທີ່ທຳນຽບປະທານປະເທດ ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 13-15 ທັນວາ ນີ້.
ທ່ານປະທານປະເທດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ຮ່າງຄຽວອານ ທີ່ໄດ້ນຳ ພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນຄັ້ງນີ້ ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມທະວີການພົວພັນຮ່ວມມື ລະຫວ່າງ ສອງປະເທດ ສປປ ລາວ ແລະ ສ ເກົາຫລີ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນ. ພ້ອມທັງ ສະແດງຄວາມເພິ່ງພໍໃຈຕໍ່ສາຍພົວພັນ ແລະ ການຮ່ວມມືອັນດີງາມ ລະຫວ່າງ ສອງປະເທດ ທີ່ໄດ້ຮັບການຂະຫຍາຍຕົວ ແລະ ແຕກດອກອອກຜົນຕົວຈິງ ເຊິ່ງສະແດງອອກ ໃນການສືບຕໍ່ແລກ ປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ ອັນໄດ້ສ້າງຄວາມ ເຊື່ອໝັ້ນ ແລະ ເຂົ້າອົກເຂົ້າໃຈກັນໃຫ້ຫລາຍຂຶ້ນກວ່າເກົ່າ, ພ້ອມນີ້ ທ່ານປະທານປະເທດ ໄດ້ກ່າວສະແດງ ຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນ ສ ເກົາຫລີ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອແກ່ ສປປ ລາວ ໃນໄລຍະຜ່ານມາ ແລະ ຫວັງຢ່າງ ຍິ່ງວ່າ ສ ເກົາຫລີ ຈະສືບຕໍ່ໃຫ້ການສະໜັບສະໜູນຊ່ວຍເຫລືອ ສປປ ລາວ ອີກໃນຕໍ່ໜ້າ ເພື່ອໃຫ້ ສປປ ລາວ ສາມາດນຳ ເອົາປະເທດຊາດ ຫລຸດພົ້ນອອກຈາກສະຖານະ ພາບດ້ວຍ ພັດທະນາ ໃນປີ 2020.
ທ່ານ ຮ່າງ ຄຽວ ອານ ໄດ້ສະແດງຄວາມຂອບໃຈມາຍັງ ທ່ານປະທານປະເທດ ແຫ່ງ ສປປ ລາວ ທີ່ໄດ້ສະຫລະເວລາອັນມີຄຸນຄ່າ ໃຫ້ກຽດຕ້ອນຮັບຢ່າງອົບອຸ່ນ ພ້ອມທັງແຈ້ງໃຫ້ຊາບກ່ຽວ ກັບຈຸດປະສົງຂອງ ການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໂດຍຕອບສະໜອງ ຕາມຄຳເຊີນຂອງ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ແລະ ໄດ້ລາຍງານຜົນການພົບປະສອງຝ່າຍທີ່ມີຂຶ້ນ ໃນຕອນເຊົ້າ ວັນດຽວກັນ ໃຫ້ປະທານປະເທດໄດ້ຮັບຊາບ. ໃນຕອນບ່າຍວັນດຽວກັນ, ທີ່ສະພາແຫ່ງຊາດ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ກໍໄດ້ຕ້ອນຮັບ ທ່ານ ຮ່າງ ຄຽວ ອານ ນາຍົກລັດຖະມົນຕີ ແຫ່ງ ສາທາລະນະລັດ ເກົາຫລີ ພ້ອມດ້ວນຄະນະເຊັ່ນດຽວກັນ.
