ພິທິມອບ-ຮັບເຄື່ອງຊ່ວຍເຫລືອ ຈາກ ສ.ເກົາຫລີ
ໃນຕອນບ່າຍວັນທີ 03 ກໍລະກົດ 2017, ທີ່ ສະຖານເອກອັກຄະລັດຖະທູດລາວ ປະຈຳ ສ.ເກົາຫລີ, ໄດ້ມີການຈັດຕັ້ງພິທີມອບ-ຮັບເຄື່ອງຊ່ວຍເຫລືອເປັນເກີບກິລາ ຈຳນວນ 1.000 ຄູ່, ມູນຄ່າປະມານ 30.000 ໂດລາ ສະຫະລັດ, ຈາກ 4 ອົງການຈັດຕັ້ງ ເຊັ່ນ: ໂຮງຫມໍ ແບັກ ຂອງ ມະຫາວິທະຍາໄລ ອິນເຈ ແຫ່ງ ນະຄອນຫລວງເຊອູນ (Inje University Seoul Paik Hospital), Bluecross Medical Volunteers, Community Chest of Korea ແລະ Unique Union ຂອງ ສ.ເກົາຫລີ ໃຫ້ແກ່ ສປປ ລາວ. ເຂົ້າຮ່ວມໃນພິທີໂດຍມີທ່ານເອກອັກຄະລັດຖະທູດ ຄຳສວຍ ແກ້ວດາລາວົງ ພ້ອມດ້ວຍພັນລະຍາ, ທ່ານ ຢອມ ໂຮກີ (Yum Ho-kee), ປະທານໂຮງຫມໍມະຫາວິທະຍາໄລ ອິນເຈ ແລະ ທ່ານປະທານຈາກອີກ 3 ອົງການ, ພ້ອມນີ້ຍັງມີທ່ານ ໂອ ມຽງຮວັນ, ປະທານສະມາຄົມມິດຕະພາບ ເກົາຫລີ-ລາວ, ບັນດາພະນັກງານສະຖານທູດ ແລະ ພະນັກງານຂອງບັນດາອົງການ, ປະທານສະມາຄົມນັກສຶກສາລາວ ແລະ ນັກສຶກສາລາວ ທີ່ ສ.ເກົາຫລີ ຈຳນວນຫນຶ່ງ. ຈຸດປະສົງຂອງການຊ່ວຍເຫລືອດັ່ງກ່າວແມ່ນເພື່ອແນໃສ່ເພື່ອຊ່ວຍເຫລືອປະຊາຊົນລາວຜູ້ຂາດເຂີນ ແລະ ດ້ອຍໂອກາດຢູ່ເຂດຫ່າງໄກສອກຫລີກ. ຜ່ານມາອົງການຈັດຕັ້ງດັ່ງກ່າວນີ້ກໍ່ເຄີຍໄດ້ໃຫ້ການຊ່ວຍເຫລືອແກ່ປະຊາຊົນລາວມາກ່ອນຫນ້ານີ້ຫລາຍເທື່ອແລ້ວ ແຕ່ຄັ້ງຜ່ານມາເຄີຍໄດ້ບໍລິຈາກເຄື່ອງນຸ່ງ ແລະ ເກີບ.
ໂອກາດດຽວກັນນີ້, ລະຫວ່າງ ສະຖານທູດ ແລະ ໂຮງຫມໍດັ່ງກ່າວ ກໍ່ໄດ້ຮ່ວມລົງນາມໃນບົດບັນທຶກຊ່ວຍຈຳ ເພື່ອຊ່ວຍເຫລືອປິ່ນປົວສຸຂະພາບຂອງພະນັກງານສະຖານທູດ ແລະ ຄົນລາວທີ່ອາໄສຢູ່ ສ.ເກົາຫລີ ລວມທັງຄົນລາວອື່ນໆທີ່ທາງສະຖານທູດສະເຫນີ ໃນລາຄານະໂຍບາຍ ແລະ ຍ່ອມເຍົາເປັນພິເສດ. ໂຮງຫມໍມະຫາວິທະຍາໄລດັ່ງກ່າວ ເປັນໂຮງຫມໍທີ່ມີເຄືອຂ່າຍກວ້າງຂວາງ ມີຈຳນວນ 35 ແຫ່ງໃນທົ່ວປະເທດ ສ.ເກົາຫລີ ແລະ ເຄີຍເຊັນ MOU ກັບ ສະຖານທູດຫວຽດນາມ ແລະ ໄຕຫວັນ.
ໃນຕອນທ້າຍ, ທ່ານເອກອັກຄະລັດຖະທູດກໍ່ໄດ້ກ່າວສະແດງຄວາມຂອບໃຈ ແລະ ໄດ້ມອບໃບກຽດຕິຄຸນໃນນາມສະຖານທູດໃຫ້ແກ່ 4 ອົງການຈັດຕັ້ງດັ່າງກ່າວ.
