ທ່ານທູດລາວ ທີ່ ເຊອູນ ເຂົ້າຮ່ວມກອງປະຊຸມສຳມະນາ ວ່າດ້ວຍການຮ່ວມມືດ້ານພະລັງງານ ສ.ເກົາຫລີ-ອາຊີ
ໃນວັນທີ 06 ກໍລະກົດ 2017, ທີ່ ໂຮງແຮມພລາຊາ, ເຊອູນ, ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດວະສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ.ເກົາຫລີ, ໄດ້ເຂົ້າຮ່ວມກອງປະຊຸມສຳມະນາ ວ່າດ້ວຍ ການຮ່ວມມືດ້ານພະລັງງານ ລະຫວ່າງ ເກົາຫລີ ແລະ ອາຊີ ເຊິ່ງຈັດໂດຍ ກະຊວງການຕ່າງປະເທດ ຂອງ ສ.ເກົາຫລີ, ໂດຍການເຂົ້າຮ່ວມເປີດກອງປະຊຸມຂອງ ທ່ານ ໂຈ ຮຸນ (Cho Hyun), ຮອງລັດຖະມົນຕີ ກະຊວງການຕ່າງປະເທດ ສ.ເກົາຫລີ, ເຊິ່ງມີສະມາຊິກສະພາຂອງ ສ.ເກົາຫລີ, ຜູ້ຕາງຫນ້າຈາກບັນດາສະຖານທູດ, ບັນດາຜູ້ຕາງຫນ້າບໍລິສັດຕ່າງໆ ແລະ ພະນັກງານທີ່ກ່ຽວຂ້ອງຂອງ ສ.ເກົາຫລີ ເຂົ້າຮ່ວມປະມານ 200 ທ່ານ. ກອງປະຊຸມຄັ້ງນີ້ ໄດ້ເຊື້ອເຊີນຜູ້ບັນຍາຍຈາກ 6 ປະເທດ ຄື: ອິນໂດເນເຊຍ, ຟິລິບປິນ, ຫວຽດນາມ, ຊາອຸດິ ອາຣາບີ, ເລບານອນ ແລະ ກູເວດ (ປະເທດທີ 7 ແມ່ນປະເທດເຈົ້າພາບ) ທີ່ຮັບຜິດຊອບວຽກງານດ້ານພະລັງງານຈາກພາກລັດ ແລະ ເອກະຊົນ ຂອງບັນດາປະເທດດັ່ງກ່າວ ມາບັນຍາຍກ່ຽວກັບນະໂຍບາຍ ແລະ ການພັດທະນາດ້ານພະລັງງານຂອງປະເທດຕົນ. ໂອກາດນີ້, ທ່ານເອກອັກຄະລັດຖະທູດ ຄຳສວຍ ແກ້ວດາລາວົງ ໄດ້ຖືໂອກາດສະເຫນີຂຶ້ນກ່າວໂດຍຫຍໍ້ກ່ຽວກັບນະໂຍບາຍ ແລະ ການພັດທະນາພະລັງງານຢູ່ ສປປ ລາວ, ໂດຍທ່ານທູດໄດ້ແຈ້ງໃຫ້ຜູ້ເຂົ້າຮ່ວມໃນທີ່ປະຊຸມຊາບ ກ່ຽວກັບນະໂຍບາຍການພັດທະນາພະລັງງານຂອງລັດຖະບານ ສປປ ລາວ ໂດຍໄດ້ເນັ້ນຫນັກທ່າແຮງຫລັກໃນການພັດທະນາເສດຖະກິດຂອງ ສປປ ລາວ ແມ່ນການພັດທະນາໄຟຟ້າພະລັງນ້ຳເປັນຕົ້ນ. ເຊິ່ງປະຈຸບັນລັດຖະບານລາວໄດ້ມີການຂະຫຍາຍຈຳນວນເຂື່ອນ ແລະ ໄດ້ເຊື້ອເຊີນໃຫ້ນັກລົງທຶນຈາກຕ່າງຊາດເຂົ້າໄປລົງຮ່ວມທຶນໃນຂະແຫນງການດັ່ງກ່າວ. ການຂຶ້ນສະເຫນີຂອງທ່ານເອກອັກຄະລັດຖະທູດໃນຄັ້ງນີ້ ແມ່ນໄດ້ເຮັດໃຫ້ຜູ້ເຂົ້າຮ່ວມໃຫ້ຄວາມສົນໃຈຫລາຍ.
