ສະຖານທູດລາວ ແລະ ຫວຽດນາມ ທີ່ ເຊອູນ ສະເຫລີມສະຫລອງສອງວັນປະຫວັດສາດ
ໃນວັນທີ 15 ກໍລະກົດ, ທີ່ ເຊອູນ, ສ.ເກົາຫລີ, ໂດຍການສົມທົບກັນ ລະຫວ່າງ ສະຖານເອກອັກຄະລັດຖະທູດລາວ ແລະ ຫວຽດນາມ ປະຈຳ ສ.ເກົາຫລີ ໄດ້ຈັດຕັ້ງພິທີສະເຫລີມສະຫລອງສອງວັນປະຫວັດສາດການພົວພັນ ແລະ ຮ່ວມມື ລາວ-ຫວຽດນາມ, ຫວຽດນາມ-ລາວ ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ 40 ປີ (18 ກໍລະກົດ 1977) ແລະ ວັນສ້າງຕັ້ງສາຍພົວ ພັນການທູດ ຄົບຮອບ 55 ປີ (05 ກັນຍາ 1962), ໂດຍການເຂົ້າຮ່ວມຂອງ ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດລາວ ພ້ອມດ້ວຍພັນລະຍາ ແລະ ທ່ານ ຫວງຽນ ວູ ຕູ (NGUYEN Vu Tu), ເອກອັກຄະລັດຖະທູດຫວຽດນາມ ພ້ອມດ້ວຍພັນລະຍາ, ມີພະນັກງານຂອງສອງສະຖານທູດ, ພະນັກງານການບິນລາວ ປະຈຳ ເຊອູນ ແລະ ນັກສຶກສາລາວຈຳນວນຫນຶ່ງທີ່ ສ.ເກົາຫລີ ເຂົ້າຮ່ວມທັງຫມົດ 50 ກວ່າຄົນ.
ໃນພິທີດັ່ງກ່າວ, ທ່ານເອກອັກຄະລັດຖະທູດລາວ ແລະ ຫວຽດນາມ ໄດ້ຜັດປ່ຽນກັນກ່າວຄຳປາໄສ ເພື່ອລະ ນຶກເຖິງພາລະກຳ ແລະ ມູນເຊື້ອປະຫວັດສາດແຫ່ງການພົວພັນ, ການຮ່ວມມື ແລະ ການຊ່ວຍເຫລືອເຊິ່ງກັນ ແລະ ກັນ ບໍ່ວ່າຍາມຕໍ່ສູ້ເພື່ອເອກະລາດແຫ່ງຊາດ ກໍ່ຄືໃນຍາມສ້າງສາພັດທະນາປະເທດຊາດ, ຍາມໃດສອງຊາດລາວ-ຫວຽດນາມ ກໍ່ໄດ້ຢືນຄຽງບ່າຄຽງໄຫລ່ຮ່ວມສຸກຮ່ວມທຸກໃນພາລະກິດປະຕິວັດ ທີ່ບັນພະບູລຸດຂອງທັງສອງປະເທດໄດ້ສ້າງໄວ້ໃຫ້ ຄົນລຸ້ນໃໝ່ໄດ້ສືບທອດຕໍ່ໄປ. ທ່ານທູດທັງສອງໄດ້ຢືນຢັນ ເຖິງການສືບຕໍ່ໃຫ້ການສະໜັບສະໜູນຊ່ວຍເຫລືອເຊິ່ງ ແລະ ກັນໃນທຸກດ້ານຂອງສອງສະຖານທູດ ກໍຄືປະຊາຊົນທັງສອງຊາດ ລາວ-ຫວຽດນາມ, ຫວຽດນາມ-ລາວ. ນອກຈາກນີ້, ເພື່ອເຮັດໃຫ້ການສະເຫລີມສະຫລອງມີບັນຍາກາດ ທັງສອງສະຖານທູດ ຍັງໄດ້ຈັດຕັ້ງແຂ່ງຂັນໂບລິ້ງມິດຕະພາບ ເຊິ່ງບັນຍາກາດແມ່ນເຕັມໄປດ້ວຍຄວາມຄຶກຄື້ນມ່ວນຊື່ນ ແລະ ສະຫນິດສະຫນົມ.
ນອກຈາກກິດຈະກຳໃນຄັ້ງນີ້ແລ້ວ, ທັງສອງສະຖານທູດຍັງຈະໄດ້ຮ່ວມກັນຈັດຕັ້ງກິດຈະກຳຮ່ວມກັນອີກໃນຕໍ່ຫນ້າ ເພື່ອເປັນການຮັດແຫນ້ນຄວາມສາມັກຄີ, ຄວາມໃກ້ຊິດຕິດແທດ ແລະ ການພົວພັນ ລະຫວ່າງ ພະນັກງານຂອງ ທັງສອງສະຖານທູດໃຫ້ແຫນ້ນແຟ້ນຍິ່ງຂຶ້ນ.
