ສະຖານທູດລາວ ທີ່ ເຊອູນ ຈັດຕັ້ງເຊື່ອມຊືມມະຕິ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລ
ໃນວັນທີ 10 ກໍລະກົດ 2016, ທີ່ ສະຖານເອກອັກຄະລັດຖະທູດລາວ ປະຈຳ ສ.ເກົາຫລີ ທີ່ ເຊອູນ, ໄດ້ມີພິທີຈັດຕັ້ງ ກອງປະຊຸມເຊື່ອມຊືມມະຕິ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ ພາຍໃຕ້ ການເປັນປະທານໂດຍ ສະຫາຍ ຄຳສວຍ ແກ້ວດາລາວົງ, ເລຂາຫນ່ວຍພັກ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ.ເກົາຫລີ, ມີບັນດາພະນັກງານສະຖານທູດ, ພະນັກງານຕາງໜ້າຫ້ອງການການບິນລາວ ປະຈຳ ສ.ເກົາຫລີ ແລະ ນັກສຶກສາລາວເຊິ່ງສ່ວນໃຫຍ່ແມ່ນພະພັກງານບັນດາຂະແໜງການຕ່າງໆອ້ອມຂ້າງສູນກາງ ເຂົ້າຮ່ວມປະມານ 50 ກວ່າທ່ານ.
ທີ່ປະຊຸມໄດ້ຮັບຟັງ ແລະ ແລກປ່ຽນຄຳຄິດຄຳເຫັນກ່ຽວກັບ ເນື້ອໃນເອກະສານສຳຄັນຕ່າງໆຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ແນໃສ່ສ້າງຄວາມຮັບຮູ້ແລະເຂົ້າໃຈຢ່າງ ເປັນເອກະພາບ ແລະ ເລິກເຊິ່ງໃຫ້ແກ່ຜູ້ເຂົ້າຮ່ວມກ່ຽວກັບນະໂຍບາຍແນວທາງປ່ຽນແປງໃໝ່ຂອງພັກ-ລັດ ໃນການສ້າງສາພັດທະນາປະເທດຊາດ ແລະ ນຳເອົາເນື້ອໃນຈິດໃຈດັ່ງກ່າວໄປຈັດຕັ້ງປະຕິບັດຜັນຂະຫຍາຍຕາມຂະແໜງການທີ່ຕົນຮັບຜິດຊອບຢ່າງເປັນຮູບປະທຳ. ໂດຍສະເພາະແມ່ນວິໄສທັດ ແຕ່ນີ້ເຖິງປີ 2030 ແລະ ຍຸດທະສາດການພັດທະນາຂອງ ສປປ ລາວ ໃນແຕ່ລະໄລຍະ ແຕ່ນີ້ ເຖິງ 2025 ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຊຸດທີ VIII ແຕ່ນີ້ເຖິງປີ 2020. ສູ້ຊົນເຮັດໃຫ້ຄຳຂັວນ “ສູ້ຊົນພັດທະນາປະເທດເຮົາໃຫ້ຫລຸດພົ້ນຈາກສະຖານະພາບດ້ອຍພັດທະນາໃນປີ 2020 ແລະ ກ້າວໄປສູ່ປະເທດກໍາລັງພັດທະນາທີ່ມີລາຍຮັບປານກາງສູງ ຕາມທິດພັດທະນາສີຂຽວ ແລະຍືນຍົງ ເມື່ອເຖິງ 2030” ກາຍເປັນຈິງເທື່ອລະກ້າວ.
ພາຍຫລັງສຳເລັດພິທີດັ່ງກ່າວ, ໃນວັນດຽວກັນໜ່ວຍສະຫະພັນແມ່ຍິງ ສະຖານທູດ ກໍ່ໄດ້ຈັດຕັ້ງພິທີປາຖະກະ ຖາເລົ່າມູນເຊື້ອວັນສ້າງຕັ້ງສະຫະພັນແມ່ຍິງລາວ ຄົບຮອບ 61 ປີ (20 ກໍລະກົດ 1955 – 20 ກໍລະກົດ 2016). ກອງປະຊຸມດັ່ງກ່າວ ໄດ້ຊຸກຍູ້, ເຕືອນສະຕິບັນດາເອື້ອຍ-ນ້ອງແມ່ຍິງລາວທີ່ຢູ່ ສ.ເກົາຫລີ ເພີ່ມທະວີການໂຄສະນາເຜີຍແຜ່ຮີດຄອງອັນເປັນເອກະລັກ ແລະ ວັດທະນະທຳອັນດີງາມຂອງຊາດລາວຕໍ່ສາກົນ ໃຫ້ກວ້າງຂວາງຂຶ້ນ.
