ສະຖານທູດລາວ ທີ່ ເຊອູນ ສະເຫລີມສະຫລອງບຸນປີໃໝ່ລາວ ພ.ສ 2560
ໃນຕອນແລງ ວັນທີ 07 ເມສາ 2017, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ເກົາຫລີ ໄດ້ຈັດງານສະເຫລີມສະຫລອງບຸນປີໃໝ່ລາວ ພ.ສ 2560 ຂຶ້ນທີ່ ສູນປະຊຸມກະຊວງປ້ອງກັນຊາດ ສ.ເກົາຫລີ, ທີ່ ເຊອູນ. ໂດຍມີແຂກຖືກເຊີນເຂົ້າຮ່ວມທັງພາກລັດ ແລະ ເອກະຊົນ ຂອງ ສ.ເກົາຫລີ, ບັນດາຄົນລາວ (ພະນັກງານ, ນັກ ສຶກສາ ແລະ ແມ່ຍິງລາວທີ່ແຕ່ງງານກັບຄົນເກົາຫລີ) ທັງຫມົດ 300 ກວ່າຄົນ.
ໃນພິທີ, ທ່ານເອກອັກຄະລັດຖະທູດ ຄຳສວຍ ແກ້ວດາລາວົງ ກໍ່ໄດ້ຂຶ້ນກ່າວໃນພິທີ ເຊິ່ງໄດ້ຍົກໃຫ້ເຫັນປະຫວັດຄວາມເປັນມາ, ຄວາມໝາຍຄວາມສຳຄັນຂອງຮີດຄອງປະເພນີ ແລະ ວັດທະນະທຳຂອງລາວ ທີ່ຕິດພັນກັບບຸນປີໃໝ່ລາວ ເຊິ່ງເປັນປະເພນີທີ່ໄດ້ສືບທອດມາແຕ່ບູຮານນະການຈົນເຖິງປະຈຸບັນ ແລະ ໄດ້ອະທິບາຍກ່ຽວກັບກິດຈະກຳຕ່າງໆຂອງການສະເຫລີມສະຫລອງປີໃຫມ່ ເປັນຕົ້ນ ການຫົດສົງພະພຸດທະຮູບ, ພະສົງ, ຜູ້ອາວຸໂສ ແລະ ການຫລິ້ນນໍ້າຂອງປະຊາຊົນລາວ, ການສົມມາ ແລະ ໄດ້ເນັ້ນຫນັກພິທີບາສີສູ່ຂັວນ ແລະ ການຟ້ອນລຳວົງລາວ, ພ້ອມນີ້ ກໍ່ໄດ້ຍົກໃຫ້ເຫັນຈຸດເດັ່ນຂອງການຫລີິ້ນບຸນສົງການຢູ່ຫລວງພະບາງທີ່ມີລັກສະນະພິເສດ ແລະ ໂດດເດັ່ນກວ່າທ້ອງຖິ່ນອື່ນໃດໃນ ສປປ ລາວ.
ຈາກນັ້ນ, ທ່ານທູດຍັງໄດ້ຖືໂອກາດ ແຈ້ງຜົນສຳເລັດການເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 28 ແລະ 29 ໃນເດືອນກັນຍາ 2016 ຜ່ານມາ ທີ່ ສປປ ລາວ ເປັນເຈົ້າພາບ, ທ່ານທູດໄດ້ຕາງຫນ້າໃຫ້ລັດຖະບານ ກໍ່ຄືປະຊາຊົນລາວສະແດງຄວາມຂອບໃຈຕໍ່ບັນດາປະເທດສະມາຊິກທີ່ເຂົ້າຮ່ວມໃນການປະກອບສ່ວນ ແລະ ໃຫ້ການຊ່ວຍເຫລືອ ໃນປີ 2016 ທີ່ ສປປ ລາວ ເປັນປະທານອາຊຽນ. ຄຽງຄູ່ກັບບັນດາກອງປະຊຸມສາກົນດັ່ງກ່າວ ກໍຍັງມີ ການຢ້ຽມຢາມ ສປປ ລາວ ຢ່າງເປັນທາງການຂອງບາງປະມຸກລັດ ແລະ ຫົວຫນ້າລັດຖະບານ ເປັນຕົນ ການຢ້ຽມຢາມຂອງ ທ່ານ ບາຣັກ ໂອບາມາ, ປະທານາທິບໍດີ ສະຫະລັດອາເມລິກາ, ທ່ານ ນາງ ປັກກຶນເຮ, ປະທານາທິບໍດີ ສ.ເກົາຫລີ ຊຶ່ງສອງຝ່າຍ ລາວ-ສ.ເກົາຫລີ ໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈຮ່ວມກັນຫລາຍສະບັບ.
ການສະເຫລີມສະຫລອງບຸນປີໃໝ່ໃນຄັ້ງນີ້ ແມ່ນດຳເນີນໄປດ້ວຍຄວາມເບີກບານມ່ວນຊື່ນ ແລະ ປະສົບຜົນສຳເລັດຢ່າງຈົບງາມ, ເຊິ່ງໃນນີ້ ໄດ້ມີການສະແດງສິນລະປະວັນນະຄະດີຂອງນັກສຶກສາລາວ ແລະ ຄະນະສິນລະປະ ສ.ເກົາຫລີ, ພ້ອມທັງໄດ້ເຊື້ອເຊີນບັນດາແຂກຮ່ວມຟ້ອນລຳວົງນຳກັນ ເພື່ອໃຫ້ເຂົາເຈົ້າຮັບຮູ້ສິລະປະ, ວັດທະນະທຳ ແລະ ຮີດຄອງປະເພນີຂອງລາວຫລາຍຂຶ້ນ.
ການຈັດພິທີສະເຫລີມສະຫລອງບຸນປີໃໝ່ລາວໃນຄັ້ງນີ້ ແມ່ນໄດ້ຮັບການສະໜັບສະໜູນຈາກສະມາຄົມບໍລິສັດຂະໜາດນ້ອຍ ແລະ ກາງ ຮັນເຊຢອນ (Hanseyeon Small and Medium Companies Association) ແລະ ພາກສ່ວນຕ່າງໆຂອງ ສ.ເກົາຫລີ ຈຳນວນຫນຶ່ງ.
