ທ່ານທູດລາວ ທີ່ ເຊອູນ ຕ້ອນຮັບການເຂົ້າຢ້ຽມຂ່ຳນັບຂອງຜູ້ຕາງຫນ້າອົງການຊຳດົງ
ໃນວັນທີ 04 ກໍລະກົດ 2017, ທີ່ ສະຖານເອກອັກຄະລັດຖະທູດລາວ ທີ່ ເຊອູນ, ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດວະສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ.ເກົາຫລີ ໄດ້ຕ້ອນຮັບການສະເຫນີເຂົ້າຢ້ຽມຂ່ຳນັບຂອງ ຜູ້ຕາງຫນ້າອົງການຊຳດົງ ອິນເຕີເນຊັນແນລ໌ (Samdong International ຫລື SDI) ຂອງ ສ.ເກົາຫລີ, ຈຸດປະສົງແມ່ນເພື່ອແຈ້ງໃຫ້ສະຖານທູດຊາບ ກ່ຽວກັບ ອົງການດັ່ງກ່າວ ໄດ້ໄປເຊັນບົດບັນທຶກຄວາມເຂົ້າໃຈ (MOU) ກັບ ພະແນກສຶກສາທິການ ແລະ ກິລາ ແຂວງຊຽງຂວາງ ກຳນົດ 05 ປີ ໃນອາທິດທີ່ຜ່ານມາ ເພື່ອພັດທະນາສະພາບແວດລ້ອມຂອງການສຶກສາ ແລະ ກິລາ ຢູ່ແຂວງດັ່ງກ່າວໃຫ້ດີຂຶ້ນກວ່າເກົ່າ, ໂດຍມີງົບປະມານຂອງໂຄງການແມ່ນ 400.000 ໂດລາ ສະຫະລັດ. ຈຸດປະສົງຂອງໂຄງການ ແມ່ນແນໃສ່ປັບປຸງອາຄານຮຽນຫລັງເກົ່າຢູ່ບັນດາໂຮງຮຽນເປົ້າຫມາຍຂອງໂຄງການທີ່ໄດ້ຈັດຕັ້ງປະຕິບັດແລ້ວນັ້ນຢູ່ແຂວງຊຽງຂວາງ, ສະຫນອງຫລັກສູດການຮຽນ-ການສອນ ເພີ່ມເຕີມ ແລະ ຝຶກອົບຮົມຄູ, ໃຫ້ທຶນການສຶກສາແກ່ເດັກນ້ອຍລາວໄປຮຽນຢູ່ ສ.ເກົາຫລີ ແລະ ເຊື້ອເຊີນນັກຮຽນ ແລະ ຄະນະຜູ້ແທນລາວໄປຢ້ຽມຢາມ ສ.ເກົາຫລີ ເພື່ອແລກປ່ຽນວັດທະນະທຳເຊິ່ງກັນ ແລະ ກັນ.
ກ່ອນຫນ້ານີ້ ໃນປີ 2014, ອົງການຊຳດົງ ໄດ້ເຊັນ MOU ກັບຂະແຫນງການດັ່ງກ່າວຂອງແຂວງຊຽງຂວາງ ແລະ ເລີ່ມຈັດຕັ້ງປະຕິບັດແຕ່ວັນທີ 01 ກຸມພາ 2014, ເຊິ່ງໄດ້ສະຫນັບສະຫນູນທຶນກໍ່ສ້າງອາຄານໂຮງຮຽນຫລັງໃຫມ່ (ຈຳນວນ 20 ຫ້ອງຮຽນ), ຫໍພັກນັກຮຽນ ຈຳນວນ 02 ຫລັງ, ປັບປຸງໂຮງຮຽນປະຖົມ ແລະ ຫໍສະຫມຸດ ພ້ອມທັງສະຫນອງຫລັກສູດຕ່າງໆ ເຊັ່ນ: ພາສາອັງກິດ, ຄອມພິວເຕີ ແລະ ອຸປະກອນການຮຽນຈາກ ສ.ເກົາຫລີ ຢູ່ ມສ ລ້ອງປິວ, ເມືອງຄຳ, ແຂວງຊຽງຂວາງ, ມູນຄ່າ 600.000 ໂດລາ ສະຫະລັດ.
